قصيدة يمنية عن العمله بعد تدهورها

سلام لك ياسيدي ما الصبح شع
وما يحن الرعد والغيث اتبعه

أبو شكيب بسم المواطن قد رفع
مطلب أنا لي منعك إنك تسمعه

ياسيدي هذا القرار اللي منع
عُمله جديده ليت ونك ترفعه

ولو لسته شهور تكفي من جمع
عمله جديده يخرج اللي جمّعه

والله محنا للسعوديه تبع
ولا تبع للقعططه والدنبعه

احنا مواجيع ارفعوا عنا الوجع
ولا تداوو الجعجعه بالجعجعه

نشتي حلول مش هكذا من جا طبع
قرار من راسه وبكر وزّعه

نشتي سيوله ذي تغطي المرتجع
نشتي مراكز شامله وموزعه

تشمل سع التحصين كل المجتمع
فيها يبدل كل واحد ما معه

ما كلّمك على الملايين الطُبع
حق السرَق والأغنيا أهل السعه

قصدي المواطن ذي معه بعض القطع
أربعميه . ألفين . ثلاثه . أربعه

يجي يدوّر خبز والفرن امتنع
والصيدليه من علاجه تمنعه

وصاحب الدكان ردّه لو دفع
حق الزبادي والمؤجر يفجعه

وهكذا من حيثما راح اصطرع
من كل صاحب مصلحه أو منفعه

هذا وعاد السعر بالسوق ارتفع
في كل شي من بعد هذي المعمعه

مُواطنك يا سيدي أصبح نصَع
وكل رامي مِن صَلَيه اتنصعه