دخلت اخـــزن بين حمران العيــون
وريحهم يااصحابنا قالوا وهــوه
قلنا وكيف الوضع قالوا صامدون
حد يشكر الحوثي وحد يلعن أبوه
وحد يقل هو صاحب القلب الحنون
ساعة يحبونه وساعة يكرهوه
قلنا لكم قبل المصايب ما تكون
هو تيس ياعامر عزيز قال احلبوه
مااليوم شلو بالزوامل وازملون
واتحمدوا رب السماء واتشكروه
كنتو بنعمة تفعلوا ما تشتهون
أحرار مرتاحين فيما تفعلوه
في كل يومين كبش معصور القرون
وتاكلوا نصة ونصة ترجموه
والقات من زين المغارس والغصون
والجيب دافي والغلا ما تحسبوه
والطفل يدرس والمره فوق الطبون
والأب متوضف براتب تذكروه
مااليوم كيف انتو بعهد الحوثيون
في وضع ما كنا نفكر توصلوه
بعد السكن فالبيت صرتوا نازحون
وكم أسر بيدوروا ماياكلوه
وأحرار أمس اليوم صاروا فالسجون
والبعض مات من كثر ماقد عذبوه
ومن توضف يخدم الحوثي بدون
راتب ولا جاء راتبة ما يصرفوه
والطفل نادى يا حوث هل تسمعون
حليب يا عبدالملك قال افطموه
والفقر لايح والغني شابع ديون
والأخ من اجل الحوث قد باع أخوه
بيجرعوكم مر وانتم ساكتون
وعادكم تتزاحموا كي تشربوه
ضعتوا من أيام ما بدأتوا تصرخون
واقع ولا باتستطيعوا تنكروه
سكوتكم عيب الشوارب والدقون
وعار با يلصق على كل الوجوه
والنصر ماهو باالأماني والضنون
والحل بيديكم فقوموا واصنعوه
ياهاجسي صيح لهم بالمكرفون
ألوه ياالأخ الذي صامت ألوه..!
صلو على طه ختام المرسلون
ختم القوافي يا محبين أذكروه.
وسلامتكم:
ليست هناك تعليقات